入U拎信用卡，做「卡神」定「卡奴」？

今年我阿錢又幫手搞O Camp，看見組仔組女們，令我想起當年踏入大學註冊時的情景，其中最有印象的，就是沿路夾道歡迎及向我招手的銀行信用卡檔口。記得我在申請人生第一張信用卡時，非常開心，感覺自己真的大個仔了。不過，當我見到師弟師妹們興致勃勃說要申請信用卡時，只著眼比較邊張卡的優惠最多或迎新禮物最正，忍不住要提醒他們，信用卡要用得其所先至醒，如果是用來「先使未來錢」，反而得不償失。

我同組仔組女講，不是嚇他們，信用卡的結欠年息動輒30厘以上，不準時還錢或者只還min pay（最低還款額）的話，利息支出好「襟計」啊！

我的同學家俊就是亂用信用卡出事。他最愛交朋結友，每天一放學都有節目，不是去晚飯聚會，就是去卡拉OK 睇戲。擴闊朋友圈子不是壞事，但問題是他長期糧尾，未到月尾就將零用錢或兼職收入花光，還去申請幾張信用卡，碌爆一張就用第二張，每個月只還min pay，最後搞到一身債。幸好，在幾個師兄師姐軟硬兼施的鞭策下，迫他一放學及在周末時禁足宿舍，不可以出外吃喝玩樂，督促他還清所有卡數。

我記得阿爸之前提醒我，適當用信用卡優惠購物、睇戲或食飯，而又準時還款，既可以慳錢，又可以賺積分換禮物，就是醒目的「卡神」。不過，如果因為這些優惠令你以為慳錢，最後反而消費多了，變成亂碌卡的大花筒，欠下周身卡數，那就變成「卡奴」，做了信用卡的奴隸了。

「卡神」定「卡奴」，你會點揀？

更多：我的第一張信用卡